فورٹ عباس: فورٹ عباس کے نواحی علاقے چک 230/9-R میں گھریلو تنازع پر رشتہ داروں کے دو گروپوں کے درمیان ہونے والے جھگڑے میں خاتون سمیت دو افراد چاقو کے وار سے زخمی ہو گئے۔
ریسکیو 1122 کے مطابق زخمیوں میں 25 سالہ محمد عبداللہ ولد شوکت علی شامل ہیں، جنہیں سینے کے بائیں جانب اور دائیں بازو پر چاقو کے زخم آئے، جبکہ 39 سالہ زبیدہ کوثر زوجہ شوکت علی کی دائیں ٹانگ کے گھٹنے کے اوپری حصے پر چاقو کا زخم لگا۔
اطلاع ملتے ہی ریسکیو 1122 کی ٹیم موقع پر پہنچ گئی، جس نے زخمیوں کو فوری ابتدائی طبی امداد فراہم کی۔ بعد ازاں دونوں زخمیوں کو مزید علاج کے لیے تحصیل ہیڈکوارٹر (THQ) ہسپتال فورٹ عباس منتقل کر دیا گیا۔
ابتدائی اطلاعات کے مطابق جھگڑا گھریلو تنازع کے باعث پیش آیا، تاہم واقعے کی مزید تحقیقات جاری ہیں۔