لاہور: وزیراعلیٰ پنجاب مریم نواز شریف کی خصوصی ہدایات پر عیدالاضحیٰ کے موقع پر صوبہ بھر میں مثالی صفائی انتظامات کے لیے ایک بڑے اور جامع صفائی آپریشن کا آغاز کر دیا گیا ہے، جس میں 1 لاکھ 84 ہزار سینیٹری ورکرز جبکہ 60 ہزار سے زائد مشینری اور گاڑیاں حصہ لیں گی۔ حکومت پنجاب کے مطابق اس خصوصی مہم کا مقصد شہریوں کو صاف ستھرا، صحت مند اور خوشگوار ماحول فراہم کرنا اور آلائشوں کی بروقت تلفی کو یقینی بنانا ہے۔
صوبائی وزیر بلدیات ذیشان رفیق نے بتایا کہ عیدالاضحیٰ صفائی آپریشن کو تین واضح مراحل میں تقسیم کیا گیا ہے تاکہ ہر سطح پر مؤثر، منظم اور بروقت کارروائی ممکن بنائی جا سکے۔ ان کے مطابق پہلا مرحلہ عید سے قبل مکمل کیا جا چکا ہے، جس میں تمام ضروری انتظامات، مشینری کی تیاری، عملے کی تعیناتی اور شہریوں میں آلائشیں جمع کرنے کے لیے بیگز کی تقسیم شامل تھی۔
انہوں نے کہا کہ دوسرا اور نہایت اہم مرحلہ چاند رات کا ہوگا، جب بازاروں کے بند ہونے کے فوراً بعد پنجاب بھر میں بڑے پیمانے پر صفائی آپریشن شروع کیا جائے گا تاکہ صبح ہونے سے پہلے تمام شہری علاقوں، مارکیٹوں اور مرکزی شاہراہوں کو مکمل طور پر صاف کیا جا سکے۔
صوبائی وزیر کے مطابق تیسرا مرحلہ عید کے تینوں دنوں پر مشتمل ہوگا، جس کے دوران تمام متعلقہ محکمے، ضلعی انتظامیہ اور فیلڈ ٹیمیں مسلسل فیلڈ میں موجود رہیں گی۔ انہوں نے کہا کہ وزیراعلیٰ پنجاب کی ہدایت پر صفائی آپریشن کی مانیٹرنگ کا عمل بھی مسلسل جاری رکھا جائے گا تاکہ ہر سرگرمی کی مؤثر نگرانی ممکن ہو اور عوام کو کسی قسم کی پریشانی کا سامنا نہ کرنا پڑے۔
حکومت پنجاب کا کہنا ہے کہ “ستھرا پنجاب” وژن کے تحت صوبے بھر میں صفائی، آلائشوں کی بروقت تلفی اور ماحول دوست اقدامات کو یقینی بنایا جا رہا ہے تاکہ عیدالاضحیٰ کے موقع پر شہریوں کو بہترین بلدیاتی سہولیات فراہم کی جا سکیں۔
