بہاولنگر: ڈپٹی کمشنر بہاولنگر ذوالفقار احمد نے کہا ہے کہ وزیراعلیٰ پنجاب مریم نواز شریف کی ہدایات کے مطابق امتحانی مراکز میں طلبہ کو پرامن، شفاف اور سازگار امتحانی ماحول فراہم کرنا ضلعی انتظامیہ کی اولین ترجیح ہے۔
ان خیالات کا اظہار انہوں نے مختلف امتحانی مراکز اور اسکولوں کے دورے کے موقع پر کیا۔ ڈپٹی کمشنر نے امتحانی کمروں کا معائنہ کیا، امتحانی عمل کا جائزہ لیا اور پیپرز کی جانچ کے نظام کو بھی چیک کیا۔
انہوں نے کہا کہ امتحانی نظام میں شفافیت، میرٹ اور نظم و ضبط کو ہر صورت یقینی بنایا جائے گا، جبکہ امتحانی مراکز کی مسلسل نگرانی جاری رکھی جائے گی تاکہ کسی بھی قسم کی بے ضابطگی یا بدانتظامی کی روک تھام ممکن بنائی جا سکے۔
ڈپٹی کمشنر نے امتحانی عملے کو ہدایت کی کہ امتحانات کے انعقاد کے دوران تمام قواعد و ضوابط پر سختی سے عملدرآمد یقینی بنایا جائے۔ انہوں نے طلبہ سے ملاقات بھی کی اور انہیں فراہم کی جانے والی سہولیات کے بارے میں دریافت کیا۔
دورے کے دوران انہوں نے امتحانی مراکز میں صفائی ستھرائی، سکیورٹی انتظامات، پینے کے صاف پانی، بجلی کی فراہمی، پنکھوں اور دیگر بنیادی سہولیات کا تفصیلی جائزہ لیا اور متعلقہ افسران کو ضروری ہدایات جاری کیں۔
ڈپٹی کمشنر کا کہنا تھا کہ طلبہ کو بہترین تعلیمی اور امتحانی ماحول کی فراہمی حکومت پنجاب کی ترجیحات میں شامل ہے اور اس سلسلے میں کسی قسم کی کوتاہی برداشت نہیں کی جائے گی۔
