فورٹ عباس: فورٹ عباس بار ایسوسی ایشن نے اسسٹنٹ کمشنر فورٹ عباس کے خلاف احتجاجی تحریک جاری رکھنے کا اعلان کرتے ہوئے ہفتہ کے روز احتجاجی ریلی نکالنے اور مکمل عدالتی بائیکاٹ کرنے کا فیصلہ کیا ہے۔
بار ایسوسی ایشن فورٹ عباس کے صدر شاہد بشیر چیمہ ایڈووکیٹ ہائی کورٹ کی زیر صدارت منعقدہ اجلاس میں مختلف امور کا جائزہ لیا گیا۔ اجلاس میں اسسٹنٹ کمشنر فورٹ عباس کے رویے اور مبینہ طرزِ عمل پر تشویش کا اظہار کرتے ہوئے متفقہ طور پر احتجاج جاری رکھنے کا فیصلہ کیا گیا۔
بار ایسوسی ایشن کی جانب سے جاری اعلامیے کے مطابق ہفتہ کے روز وکلاء عدالتی کارروائی کا بائیکاٹ کریں گے اور احتجاجی ریلی بھی نکالی جائے گی۔ اعلامیے میں کہا گیا ہے کہ اسسٹنٹ کمشنر کے مبینہ رویے کے خلاف وکلاء متحد ہیں اور اپنے مطالبات کی منظوری تک احتجاج کا سلسلہ جاری رکھا جائے گا۔
بار ایسوسی ایشن نے اپنے ارکان سے اپیل کی ہے کہ وہ احتجاجی ریلی اور عدالتی بائیکاٹ میں بھرپور شرکت کریں تاکہ وکلاء برادری کے مؤقف کو مؤثر انداز میں اجاگر کیا جا سکے۔
اعلامیے میں مزید کہا گیا کہ آئندہ کے لائحہ عمل کا فیصلہ بھی حالات اور متعلقہ حکام کے رویے کو مدنظر رکھتے ہوئے کیا جائے گا، جبکہ بار ایسوسی ایشن نے واضح کیا ہے کہ وکلاء کے وقار اور پیشہ ورانہ احترام کے تحفظ کے لیے ہر آئینی اور قانونی راستہ اختیار کیا جائے گا۔
