Category: واٹر اینڈ سینی ٹیشن

بہاولنگر (نمائندہ خصوصی): بہاولنگر میں پینے کے صاف پانی کی فراہمی کے لیے مختلف ادوار میں قائم کیے گئے متعدد واٹر فلٹر پلانٹس غیرفعال ہونے کے باعث شہری آج بھی بنیادی سہولت سے محروم ہیں۔ شہریوں اور سماجی حلقوں نے متعلقہ حکام سے فوری نوٹس لینے اور بند فلٹر پلانٹس کو فعال بنانے کا مطالبہ کیا ہے۔

انسانی حقوق کی تنظیم کے عہدیدار میاں مشتاق احمد جوئیہ نے ایک نجی ٹی وی کو انٹرویو دیتے ہوئے کہا کہ عوامی نمائندوں کی جانب سے مختلف علاقوں میں واٹر فلٹر پلانٹس تو نصب کیے گئے، تاہم ان میں سے بیشتر منصوبے فعال نہیں ہیں اور عوام کو ان سے کوئی عملی فائدہ نہیں پہنچ رہا۔

انہوں نے بتایا کہ جودھیانہ بستی میں قائم فلٹر پلانٹ مبینہ طور پر نصب ہونے کے بعد ایک دن بھی مکمل طور پر فعال نہیں ہو سکا، جبکہ فیصل کالونی اور ریگڑہ بستی کے فلٹر پلانٹس بھی طویل عرصے سے بند پڑے ہیں۔

اسی طرح چشتیاں روڈ وکلا کالونی میں قائم فلٹر پلانٹ میں پانی کی فراہمی نہ ہونے کے برابر ہے، جبکہ جیل روڈ پر واقع فلٹر پلانٹ مکمل طور پر غیرفعال ہے۔ ماڈل ٹاؤن کا فلٹر پلانٹ بھی خستہ حالی اور ناقص دیکھ بھال کا شکار بتایا جاتا ہے۔

شہریوں کا کہنا ہے کہ واٹر فلٹر پلانٹس پر سرکاری وسائل خرچ کیے گئے، لیکن مناسب نگرانی اور دیکھ بھال نہ ہونے کے باعث یہ منصوبے اپنی افادیت کھو چکے ہیں۔ ان کا مؤقف ہے کہ گرمی کے موسم میں صاف پانی کی عدم دستیابی نے عوامی مشکلات میں مزید اضافہ کر دیا ہے۔

سماجی رہنماؤں نے ڈپٹی کمشنر بہاولنگر سے مطالبہ کیا ہے کہ تمام غیر فعال فلٹر پلانٹس کا فوری سروے کروا کر انہیں فعال بنایا جائے تاکہ شہریوں کو صاف اور محفوظ پینے کا پانی فراہم کیا جا سکے۔

شہری حلقوں کا کہنا ہے کہ منتخب عوامی نمائندوں کو بھی اس اہم مسئلے پر توجہ دینی چاہیے اور ترقیاتی منصوبوں کی صرف افتتاحی تقریبات تک محدود رہنے کے بجائے ان کی مسلسل نگرانی اور مؤثر آپریشن کو یقینی بنانا چاہیے۔

مقامی افراد کے مطابق صاف پانی ہر شہری کا بنیادی حق ہے اور متعلقہ اداروں کی ذمہ داری ہے کہ وہ عوام کو اس بنیادی سہولت کی فراہمی کے لیے عملی اقدامات کریں۔

چشتیاں: شہر کے وسط میں متعدد مقامات پر گٹروں کے ڈھکن عرصہ دراز سے غائب ہیں، جس سے راہگیروں اور گاڑیوں کو شدید خطرات لاحق ہیں۔ اہل محلہ نے کئی بار بلدیہ انتظامیہ کو تحریری اور زبانی شکایات دیں، لیکن انتظامیہ ہر بار ان شکایات کو نظر انداز کرتی رہی۔ مقامی شہریوں کا کہنا ہے کہ انتظامیہ کا رویہ کسی بڑے سانحے کی منتظر ہے۔

واضح رہے کہ وزیراعلیٰ پنجاب مریم نواز شریف نے مین ہول کے ڈھکنوں کی حفاظت اور بروقت مرمت کے حوالے سے سخت ہدایات جاری کی تھیں، مگر چشتیاں کی بلدیہ انتظامیہ ان احکامات پر عملدرآمد سے انکاری ہے۔ شہری عوامی حلقوں کا کہنا ہے کہ بلدیہ چشتیاں میں مبینہ طور پر کرپٹ عناصر کی اجارہ داری ہے، اور بوگس بل (جعلی درخواستیں) تیار کیے جا رہے ہیں جس سے خزانے کو شدید نقصان پہنچ رہا ہے۔

شہریوں کا مطالبہ ہے کہ وزیراعلیٰ پنجاب مریم نواز شریف بلدیہ چشتیاں کا خفیہ آڈٹ کرائیں، اور کرپٹ ملازمین کے خلاف سخت ترین کارروائی عمل میں لائی جائے۔ ساتھ ہی گٹروں کے غائب ڈھکنوں کو فوری طور پر بحال کرایا جائے تاکہ کسی ناگہانی حادثے سے بچا جا سکے۔

فیصلہ کن اقدامات نہ ہوئے تو شہری احتجاج کرنے پر مجبور ہوں گے، مقامی شہریوں کا بیان

واضح رہے کہ اس ضمن میں چیف سیکرٹری پنجاب اور کمشنر بہاولپور ڈویژن سے بھی شہریوں نے فوری نوٹس لینے کی اپیل کی ہے۔

مقامی انٹظامیہ کی عدم توجہی، اسسٹنٹ کمشنر چشتیاں کو با قاعدہ درخواست دینے کے باوجود مسئلہ کے حل کے لئے کوئی پیش رفت نہ ہوسکی

چشتیاں: گلشن اقبال چوک کے قریب قاضی والا روڈ پر قائم برساتی نالہ بند ہونے کے باعث گندا پانی سڑکوں اور اطراف میں جمع ہونا شروع ہوگیا ہے، جس سے علاقے کے دکانداروں اور رہائشیوں کو شدید مشکلات کا سامنا ہے۔ شہریوں کے مطابق تعفن اور گندگی کے باعث مختلف بیماریاں پھیل رہی ہیں جبکہ صورتحال روز بروز خراب ہوتی جا رہی ہے۔

مقامی شہریوں نے انتظامیہ سے فوری نوٹس لینے کا مطالبہ کرتے ہوئے کہا ہے کہ برساتی نالے کی صفائی نہ ہونے کے باعث گندا پانی نالے سے باہر نکل کر بازار اور رہائشی علاقوں میں داخل ہو رہا ہے۔ شہریوں کا کہنا ہے کہ متعدد افراد پہلے ہی بیماریوں کا شکار ہو چکے ہیں جبکہ مزید لوگوں کے متاثر ہونے کا خدشہ موجود ہے۔علاقہ مکینوں کے مطابق اس مسئلے کے حل کے لیے ایک شہری نے مورخہ 30 اپریل 2026 کو اسسٹنٹ کمشنر اور بلدیہ حکام کو باقاعدہ درخواست بھی جمع کروائی تھی، تاہم 22 مئی 2026 تک اس پر کوئی عملی کارروائی نہیں کی گئی۔ شہریوں نے الزام عائد کیا کہ انتظامیہ نے درخواست کو نظر انداز کر دیا ہے۔

شہریوں نے عیدالاضحیٰ سے قبل فوری صفائی آپریشن کا مطالبہ کرتے ہوئے کہا کہ حکومت کے “صاف ستھرا پنجاب” وژن کو عملی شکل دینے کے لیے ضروری ہے کہ نکاسی آب کے مسائل ترجیحی بنیادوں پر حل کیے جائیں تاکہ عوام کو بیماریوں اور بدبو سے نجات مل سکے۔

چشتیاں(نمائندہ مقامی حکومت) چشتیاں میں ہلکی سی بارش نے شہر کی نااہل انتظامیہ اور انکی کارکردگی پر سوال اٹھا دیے ہیں۔ چشتیاں میں حالیہ بارش نے شہری انتظامیہ اور میونسپل کمیٹی کی کارکردگی کا پول کھول کر رکھ دیا ھے جس پہ شہری حلقوں میں کڑی تنقید کی جا رہی ھے۔گوکہ بارش کا برسنا لوگوں کے لئے باعث رحمت ھوتا ھے لیکن یہاں صورت حال بالکل مختلف ھے۔ بارش کے چند قطروں کے بعد ہی شہر کے اہم چوکوں، چوراہوں اور مرکزی شاہراہوں پر پانی جمع ہو گیا، جس کے باعث شہریوں کو شدید مشکلات کا سامنا کرنا پڑا۔مقامی افراد کے مطابق گلی محلوں کی صورتحال تو پہلے ہی ابتر تھی، تاہم اب شہر کے مرکزی علاقوں میں بھی سیوریج کا نظام ناکام دکھائی دیتا ھے۔ شہریوں کا کہنا ہے کہ انتظامیہ کی جانب سے کیے گئے دعوے اور حالیہ اقدامات محض نمائشی ثابت ہوئے ہیں جبکہ عملی طور پر کوئی مؤثر بہتری نظر نہیں آئی۔مزید برآں، شہری حلقوں میں اس بات پر بھی تشویش پائی جاتی ہے کہ

مقامی سیاسی راہنماوں کی جانب سے مختلف مواقع پر ترقیاتی کاموں کو بڑھا چڑھا کر پیش کیاجاتارہا ھے۔

جبکہ زمینی حقائق اس کے بالکل برعکس ہیں۔ مقامی عوامی نمائندوں اور میونسپل کمیٹی کے ذمہ داران پر الزام ہے کہ وہ بنیادی مسائل کے حل کے بجائے نمائشی سرگرمیوں پر زیادہ توجہ دے رہے ہیں۔شہریوں نے وزیر اعلی پنجاب مریم نواز شریف سے مطالبہ کیا ہے کہ چشتیاں شہر میں نکاسی آب کے نظام کو فوری طور پر بہتر بنایا جائے اور حالیہ صورتحال کی غیر جانبدارانہ انکوائری کےذریعے ذمہ داران کا تعین کرکے انکے خلاف سخت کاروائی کی جائے۔ شہریوں کا کہنا ہے کہ اگر بروقت اقدامات نہ کیے گئے تو آئندہ مون سون کی بارشوں میں صورتحال مزید سنگین ہو سکتی ہے۔

چشتیاں (نمائندہ مقامی حکومت) تحصیل چشتیاں کے علاقے بھٹہ کالونی میں ناقص سیوریج نظام کے خلاف علاقہ مکینوں نے عید الفطر کے روز احتجاج کیا۔ کئی روز سے گلیوں میں گندا پانی جمع ہونے کے باعث شدید بدبو اور تعفن پھیل گیا ہے جس سے شہریوں کو شدید مشکلات کا سامنا ہے۔

مقامی افراد کے مطابق سیوریج کا پانی گھروں کے باہر کھڑا رہنے سے نہ صرف آمدورفت متاثر ہو رہی ہے بلکہ نماز اور دیگر روزمرہ معمولات کی ادائیگی بھی مشکل ہو گئی ہے۔ شہریوں کا کہنا ہے کہ انہوں نے متعدد بار بلدیہ حکام کو شکایات درج کروائیں، تاہم کوئی مؤثر کارروائی عمل میں نہیں لائی گئی۔

عید جیسے اہم مذہبی موقع پر بھی صفائی اور نکاسی آب کے ناقص انتظامات کے باعث صورتحال جوں کی توں رہی جس پر مکینوں نے احتجاج کرتے ہوئے حکام کے خلاف شدید نعرے بازی کی۔ مظاہرین نے مطالبہ کیا کہ فوری طور پر نکاسی آب کے نظام کو بہتر بنایا جائے اور علاقے میں صفائی کے مؤثر انتظامات کیے جائیں۔

مظاہرین نے وزیر اعلیٰ پنجاب مریم نواز سے اپیل کی کہ چشتیاں اور اس کے نواحی علاقوں میں صفائی اور سیوریج کے مسائل کے حل کے لیے ہنگامی بنیادوں پر اقدامات کیے جائیں اور دیانتدار و فرض شناس افسران تعینات کیے جائیں تاکہ شہریوں کو بنیادی سہولیات فراہم کی جا سکیں۔

بلدیہ چشتیاں میں اہل و دیانتدار افسران کی تعیناتی کو یقینی بنایا جائے۔

چشتیاں – ایک ماہ تک جاری رہنے والی 47 ڈگری سینٹی گریڈ کی شدید گرمی کے بعد جیسے ہی چشتیاں میں مون سون کی پہلی بارش ہوئی، شہر کے باسیوں پر ایک نیا عذاب ٹوٹ پڑا۔ ناقص نکاسی آب اور غیر فعال سیوریج سسٹم کے باعث شہر کے بیشتر علاقے بارش کے پانی میں ڈوب گئے۔

بازار، مصروف سڑکیں، سرکاری و نجی دفاتر، کاروباری مراکز -سبھی جگہیں پانی میں گھر گئیں۔ واضح رہے کہ کچھ سال قبل سیوریج نظام کی بہتری کے لیے ایک ارب بیس کروڑ روپے کی لاگت سے ایک منصوبہ شروع کیا گیا تھا، جو مکمل ناکامی کا شکار ہو چکا ہے۔

ذرائع کے مطابق بلدیہ چشتیاں کے ایڈمنسٹریٹر اور دیگر متعلقہ افسران نے پنجاب حکومت کی واضح ہدایات کے باوجود سیوریج نالوں کی صفائی پر کوئی توجہ نہ دی۔ نتیجتاً، ہائی وے روڈ، منہاج ٹریول چوک، ملک مظفر چوک، تحصیل ہیڈکوارٹر ہسپتال چوک، بلدیہ چوک، چمن بازار، غلہ منڈی، جامعہ بازار سمیت متعدد علاقے پانی میں ڈوب گئے۔

بارش کے بعد شہریوں کو گزرنے میں سخت مشکلات کا سامنا ہے جبکہ بلدیہ حکام مکمل خاموش تماشائی بنے ہوئے ہیں۔

شہریوں، سیاسی و سماجی تنظیموں اور کاروباری حلقوں نے وزیراعلیٰ پنجاب مریم نواز شریف، چیف سیکرٹری پنجاب اور کمشنر بہاولپور سے مطالبہ کیا ہے کہ نکاسی آب کے اس بحران پر فوری نوٹس لیا جائے۔ متعلقہ افسران کی غفلت، لاپرواہی اور مبینہ بددیانتی پر کارروائی کی جائے اور بلدیہ چشتیاں میں اہل و دیانتدار افسران کی تعیناتی کو یقینی بنایا جائے۔

عوام نے زور دیا ہے کہ بارش کے پانی کی فوری نکاسی کے لیے ہنگامی اقدامات کیے جائیں تاکہ شہری زندگی معمول پر آ سکے۔

چشتیاں (نمائندہ خصوصی) اہلیان چشتیاں نے بدبودار اور سیوریج ملے پانی کی فراہمی کے خلاف شدید احتجاج کرتے ہوئے مطالبہ کیا ہے کہ بدبودار پانی کی بجائے پینے کا صاف پانی ہر گھر تک پہنچایا جائے۔ شہریوں نے اس سنگین مسئلے پر اپنی گہری تشویش کا اظہار کرتے ہوئے مقامی ایم این اے احسان الحق باجوہ، اسسٹنٹ کمشنر/ ایڈمنسٹریٹر بلدیہ چشتیاں اور خاص طور پر چیئرمین پنجاب صاف پانی اتھارٹی میاں زاہد اکرم کو شدید تنقید کا نشانہ بنایا ھے۔

اہلیان چشتیاں کا کہنا ہے کہ صاف پانی کی فراہمی پنجاب صاف پانی اتھارٹی کی بنیادی ذمہ داری ہے اور میاں زاہد اکرم اس ادارے کے سربراہ ہونے کے ناطے براہ راست جوابدہ ہیں۔ شہریوں نے سوال اٹھایا ہے کہ جب پنجاب صاف پانی اتھارٹی کا مقصد ہی شہریوں کو صاف پانی فراہم کرنا ہے تو پھر چشتیاں کے باسی کیوں کئی عرصے سے بدبودار اور مضر صحت پانی پینے پر مجبور ہیں؟

شہری اتحاد نے ایم این اے احسان الحق باجوہ سے بھی مطالبہ کیا ھے کہ وہ اہلیان چشتیاں کی نمائندگی کا حق ادا کرتے ھوئے مقامی انتظامیہ سے انکی غفلت اور نااہلی کے حوالے سے باز پرس کریں جن کی وجہ سے شہری پینے کے صاف پانی جیسی بنیادی سہولت سے محروم ہیں۔ بدبودار پانی کی فراہمی کے باعث نہ صرف شہریوں کو شدید پریشانی کا سامنا ہے بلکہ ہیضہ، ٹائیفائیڈ اور دیگر آبی امراض پھیلنے کا خدشہ بھی بڑھ گیا ہے۔شہریوں نے مطالبہ کیا ہے کہ بلدیہ کے عملے کی نااہلی اور پنجاب صاف پانی اتھارٹی کی عدم توجہی کا فوری نوٹس لیا جائے اور ذمہ داران کے خلاف سخت کارروائی کی جائے۔ انہوں نے خبردار کیا ہے کہ اگر ان کے جائز مطالبات پر فوری توجہ نہ دی گئی اور صاف پانی کی فراہمی کو یقینی نہ بنایا گیا تو وہ احتجاج کا دائرہ وسیع کرنے پر مجبور ہوں گے اور ذمہ داران کے خلاف احتجاج کے علاوہ قانونی چارہ جوئی کا حق بھی محفوظ رکھتے ہیں۔