کراچی: پاکستان میں الیکٹرک گاڑیوں کی تعداد میں مسلسل اضافہ ای وی چارجنگ اسٹیشنز کے شعبے کو تیزی سے ابھرتا ہوا کاروباری موقع بنا رہا ہے۔ ماہرین کے مطابق جس طرح ماضی میں سی این جی سیکٹر میں ابتدائی سرمایہ کاری کرنے والوں نے نمایاں کامیابی حاصل کی، اسی طرح الیکٹرک گاڑیوں کے لیے چارجنگ انفراسٹرکچر آئندہ برسوں میں ایک اہم کاروباری شعبہ بن سکتا ہے۔
مارکیٹ ذرائع کے مطابق پاکستان میں ہر ماہ تقریباً 300 نئی الیکٹرک گاڑیاں فروخت ہو رہی ہیں اور یہ تعداد مسلسل بڑھ رہی ہے، جس کے باعث ملک بھر میں جدید چارجنگ اسٹیشنز کی ضرورت میں بھی تیزی سے اضافہ ہو رہا ہے۔
ماہرین کا کہنا ہے کہ بڑے شہروں، موٹرویز اور شمالی سیاحتی علاقوں میں چارجنگ اسٹیشنز کا نیٹ ورک توسیع پا رہا ہے، تاہم موجودہ طلب کے مقابلے میں مارکیٹ میں اب بھی وسیع گنجائش موجود ہے، جو سرمایہ کاروں کے لیے ایک پرکشش موقع فراہم کرتی ہے۔
حکومتِ پاکستان بھی الیکٹرک وہیکل پالیسی کے تحت ملک میں ای وی انفراسٹرکچر کے فروغ پر توجہ دے رہی ہے۔ سرکاری اہداف کے مطابق سال 2030 تک ملک بھر میں تقریباً 10 ہزار ای وی چارجنگ اسٹیشنز قائم کرنے کا منصوبہ ہے، جبکہ سندھ حکومت نے بھی صوبے میں 650 ای وی چارجنگ اسٹیشنز نصب کرنے کا ہدف مقرر کیا ہے۔
کاروباری ماہرین کے مطابق ای وی چارجنگ اسٹیشنز میں سرمایہ کاری کے لیے مختلف مالیاتی ماڈلز دستیاب ہیں۔ سرمایہ کار اپنی ضرورت کے مطابق کیش پر خریداری، لیزنگ یا ریونیو شیئرنگ جیسے ماڈلز اختیار کر سکتے ہیں۔ بعض کمپنیوں کی جانب سے مناسب کمرشل لوکیشن رکھنے والے افراد کے لیے خود چارجنگ اسٹیشن نصب کرکے باہمی شرائط کے تحت کاروباری شراکت داری کی سہولت بھی فراہم کی جا رہی ہے۔
ماہرین کا کہنا ہے کہ اگر کسی سرمایہ کار کے پاس موزوں کمرشل مقام موجود ہے یا وہ مستقبل کے لیے پائیدار کاروباری مواقع کی تلاش میں ہے تو ای وی چارجنگ انفراسٹرکچر ایک قابلِ غور سرمایہ کاری ثابت ہو سکتا ہے۔
Source: https://EvCharger.pk
