چشتیاں: چشتیاں میں انتظامیہ اور پیرا فورس کی ملی بھگت سے رات 12 بجے کے بعد تک بھی دکانیں ،کیفے،ٹی سٹالز،برگر شوارما کے سٹالز کھلے رہتے ہیں جو کہ حکومت کی کفایت شعاری کی مہم کی سنگین خلاف ورزی ہے جبکہ چشتیاں کے پرائس کنٹرول مجسٹریٹس کی غفلت اور عدم دلچسپی کی بنا پر چائے کا کپ سو روپے تک فروخت ہورہا ہے۔
چشتیاں کے شہریوں نے وزیر اعلی پنجاب مریم نوازشریف سے اپنے مطالبہ میں کہا ہے کہ اسسٹنٹ کمشنر چشتیاں اور پیرا فورس کے اہلکاروں کی ملی بھگت سے کالج روڈ،قاضی والا روڈ،مین بازار اور دوسری جگہوں پر کیفے،ٹی سٹالز ، برگر شوارما وغیرہ کے سٹالز رات 12بجے کے بعد بھی کھلے رہتے ہیں جبکہ ایسے کاروبار کرنے والوں کو رات 11 بجے تک کاروبار کرنے کی اجازت ہے۔
شہریوں نے اسسٹنٹ کمشنر چشتیاں اور پیرا فورس کے اہلکاروں کو کفایت شعاری حکومتی مہم کی کھلم کھلا خلاف ورزی کے ثبوت بھی فراہم کئے لیکن انہوں نے مخصوص مفادات کے تحت چشم پوشی اختیار کرتے ہوئے کوئی کاروائی نہیں کی۔شہریوں نے مطالبہ کیا ہے کہ اسسٹنٹ کمشنر اور پیرا فورس کے اہلکاروں کو تبدیل کرکے فرض شناس دیانتدار افسران کو تعینات کیا جائے اور 12 بجے تک کاروبار کرنے والوں کے خلاف سخت کاروائی عمل میں لائی جائے۔
